حاجة تقرف حاجة تغيظ
فعلا بقت حاجة تغيظ
نمسك الموضوع م الأول .....
الشعب المصري العظيم قرّر يخرج في ثورة شعبية ..
ليه؟
- عشان يعدل الاوضاع و يثور على الظلم
خلاص يا جماعة الوزارة استقالت
- لا عاوزين حل مجلس الشعب و الشورى
خلاص يا جماعة المحكمة هتفصل في الطعون
- لا عاوزين انتخابات نزيهة
خلاص يا جماعة مش هرشح نفسي ولا ابني
- لا عاوزينك انت تمشي
طيب بعد الانتخابات !!
- لا تمشي دلوقتي
طيب امشي اروح فين
- معرفش بس تمشي
طيب افهم
- لا تمشي
طيب البلد هتبوظ
- مش مهم بس تمشي
طيب ينفع امشي و آجي تاني؟
- آه بس تمشي
خلاص خلاص همشي .. سلامو عليكو
- هييييييييييييييييييييييييييييييييييييه
و رجع الشعب المصري لبيته .. لقي الثورة خلصت بسرعة .. و لسة اجازة الدراسة شغالة
نعمل إيه عشان نسلي وقتنا؟
- تعالوا ننزل التحرير نعمل مظاهرات
نعمل مظاهرات ليه يا جماعة عاوزين إيه؟
- ننزل بس و بعدين نقعد في التحرير نتفق .. بس المهم ننزل
يللا بينا
- الشعب يريد اسقاط النظام
ايوة يا شباب ماهو النظام سقط خلاص
- ايوة صح .. طيب الشعب يريد اسقاط الحكومة
- ماهي الحكومة سقطت يا شباب عاوزين ايه؟
- ايوة صح .. طيب الشعب يريد اسقاط احمد شفيق
ليه يا رجالة؟
- اصله من ريحة مبارك
طيب و بعدين؟ دا راجل ناجح و محترم
- ايوة عارفين بس من ريحة مبارك خليه يمشي
لا اله الا الله .. هو انتو عاوزين تمحوا ريحة مبارك ولا تصلحوا مصر؟
- احنا عاوزين نعمل مظاهرة .. الشعب يريد اسقاط احمد شفيق
طيب نفهم؟
- لا يمشي
طيب فترة انتقالية
- لا يمشي دلوقتي
طيب عشان منبتديش من جديد؟
- لا يمشي دلوقتي
طيب ينفع يمشي و ييجي بعدين؟
- آه بس يمشي
انتو مجانين؟
- آه بس يمشي
خلاص يا جماعة .. انا هستقيل
- مش معقول كدة .. مش كل ما نطلب حاجة تتنفذ .. انتو بتضحكوا علينا عشان نسيب التحرير؟
طيب مش هنسيبه
و لازم نعمل مظاهرة ..
- الشعب يريد اسقاط رئيس الوزراء الجديد؟
اللي هو مين؟
- منعرفش بس عاوزينه يمشي !!
طيب مش لا نعرف هو مين الاول؟
- طيب خلاص هنستنى لما نعرف هو مين و بعدين نطلب انه يمشي
طيب اتفضلوا بقى على بيوتكم خلونا نشتغل
- لا يمشي
مين هو اللي يمشي؟
- مش عارفين .. احنا هننزل الميدان و نتفق مين هو اللي يمشي .. المهم ان في حد يمشي
و بعد ما مشيت مصر كلها .. فهذه هي المظاهرة القادمة من شباب مصر الذي استحلى اللعبة
و عجبته رحلة ميدان التحرير
- الشعب يريد اسقاط ابوالهول
عاوزين ايه؟
- عاوزين ابو الهول يتنحى عن منصبه
اشوفكم في المظاهرة الجاية
إمضاء ... حدوتة مصرية